ای کرکوک!
صادق بشيرلی کرکوکلو
ياپيشسين جسميمه دردين، سريلسين کؤکسومه آهين
غمين بو باشه گلسين هم قادان بو جانه ای کرکوک!
گوزه‌لدير توپراغين دونياده لؤلؤده‌ن جواهرده‌ن
داشين بنزه‌ر ده‌نيزلرده‌ن چيقان مرجانه ای کرکوک!
ولاکين ديشده بارماق، چوق يورکده اودلو حسرت وار
کي، دؤنموش توپراغين بير قورخولو زندانه ای کرکوک!
سوسوز قالميش «چاييندان» آغلادی «صادق»(۱) گئچن گونلر
«خاصان»(۲) آقدی بو گونلر آما دؤنموش قانه ای کرکوک!
يوره‌کلر دوغروسو «گورگور بابا»ن(۳) تک اودلودور اودلو
اودوندان قالميشيق باللهی يانه ـ يانه ای کرکوک!
آچيق ـ آشکاری بو دولموش کي، آلتين «قاره آلتيندان»(۴)
نده‌ن قالميشسان آما هر زامان ويرانه ای کرکوک!
او گون «صادق» زامانی دوشدو اهلين هر چتين درده
بو گون بيزلر چالينديق گؤر نه ياندان ـ يانه ای کرکوک!
قارا نفتيله غربين ائولری گون تک ايشيقلاندی
دومانی آما دؤنده‌ردی سنی کولخانه ای کرکوک!
کناريندان اسن يئللر دئشير ياره‌م، سؤکور درديم
نولور بين دفعه‌ده درديم دئسه‌م لقمانه ای کرکوک!
يوزون چوق موم(۵) گيبی پارلاتما انصاف ائت مروت قيل
کی وار بوردا قاناتی چوق قيريق پروانه ای کرکوک!
مگر ليلاسن ای جانلار عزيزی! سن بو دؤوراندا؟
منی مجنون تک ائتميش فرقتين ديوانه ای کرکوک!
اينان سنسيز می ايچسم‌ده دؤنر آغزيمدا می زهره
اولور غمخانه تک سنسيز منه ميخانه ای کرکوک!
بو آقشاملار گيبی سن‌ده بيله‌يدين باشداکی حاليم
گؤره‌يدين بير نئجه درديم گلير طوفانه ای کرکوک!
آغيرتديم باشلاری شعريله، شعريم دولدو اسمينده‌ن
قولاق وئر «قم»دان افلاکه چيقان افغانه ای کرکوک!
توکنسه‌يدی بو غربت ييللری عؤمرومده، دؤنسه‌يديم
باسارديم داشينی ـ توپراغينی بو جانه ای کرکوک!
---------------------------
(۱). رحمتليک «محمد صادق»: کرکوگون ان‌شهرتلی اؤنده گلن و «فارسجا. عربجه و تورکجه» ديللرينده بديعی اثرلر ياراتميش اولان شاعر. ۱۹۶۷ م ييلنده وفات ائتميشدير.
(۲). خاصا: کرکوک شهری‌نين اورتاسيندان کئچن بير چای آدی‌دير.
(۳). گرگر بابا: کرکوکده هميشه شعله ساچان بير نفت يا خود گاز قويوسونون آدی‌دير.
(۴). آلتين: قيزيل.// قاره‌آلتين: نفت.
(۵). شام، شمع
مأخذ: صادق بشيرلی کرکوکلو. شعر مجموعه‌سی: يوواسيز قوش. مقدمه: ائلشن اوريادلی. ايران: قم: دارالاعتصام؛ للطباعه و النشر. بيرينجی چاپ. چاپخانه مهر. ۱۹۹۷. ميلادی.
بو شعری شاعير قومدا سورگون اولارکن، کرکوکون فرقتينده و حسرتينده سؤيله‌ميشدير. آنجاق آمئريکانين يوروشونده صدامين بعث رژيمی داغيلاندان سونرا عزيز شاعير صادق بشيرلر جنابلاری‌دا عراقا کوچدو و اؤز دغما يوواسی و آنا يوردو کرکوکه يئتدی و حسرت گونلری اوتدو. عزيز بشيرلی‌يه عراق تورکلريله بئله موتلو و قوتلو ياشاييش ديله‌ييريک!
¤ نوشته شده در ساعت 12:12 توسط mohemmed tuzlu
posted by Mehran Baharlı @ 8:47 PM
0 Comments:
Post a Comment
<< Home