سايت شمس`ين عراق كوردوستاني`نين موختار حٶكومتي`نين ، توركمان وزيري ايله دانيشيغي
جودت جرجيس النجار: توركمانلارين دوروملاري كوردوستان حٶكومتينده چوخ ياخشيدير
بو يازي سٶزوموز فونئتيك يازيمي اساسيندا ائديت ائديلميشدير.
آزربايجان خالقي تاريخ بويو كورد خالقي ايله قونشولوقدادير. وطن قونشولاريندان قاچماق اولماز. اونلاري اونوتماق اولماز. اونلار گٶرمه ديم ساييلماز. وطن قونشولاري زامان ـ زامان قونشو قاليب، قونشو ياشاياجاقلار. بوگون كوردوستان`دا گئده ن اولاي و سيياستلر، ايسته ر ايسته مه ز اونون قونشولاريني ائتگيله نديرير، او جومله دن آزربايجان آنا وطنيميز بو حاديثه لرين دالغالاريندان هئچ تأثيرسيز قالمير. اوسته ليك توركييه كوردلري، تورك دٶولتي حوكمدارليقينداديرلار .
ايران كوردوستاني، آزربايجانيميزلا بيرليكده پهلوي شووئنيسمينين ييرتيجيليغيندان ياراليدير. عراق`دا اولان كوردلر كركوك و اربيل توركلري ايله بيرليكده تورپاق اورتاقليغينا ماليكديرلر. اوسته ليك دونيا باسقينچيلاري مين بير فيريلداق و اويون بازليقلا، چاليشيرلار ايكي بٶيوك خالقي (آزربايجان و كوردستان) بير بيرييله دٶيوشدورسونلر، يابانجيلار ايران`دا كوردلري آزربايجان اراضيسينه تاماهلانديريب و اونلاري بو تورپاقلارا يييه له نمه يه دوغرو يٶنه لتمك قصدينده ديرلر. بو مساله لري نظرده آلاراق، بيز آزربايجانچيلار كوردوستان اولاِِيلارينا آرتيق ديققت وئرمه ليييك.
عراق كوردوستاني`ندا حياتا گئچيريله ن اولايلار بيزلري ايكي قات دوشوندورور. بير طرفدن اورادا اوزه چيخان سيياستلر بيزيم يوردوموز آزربايجان`ي دا دالغالانديرابيلير. او بيري طرفدن بيز آزربايجانچيلار اورداكي اربيل و كركوك توركمانلارينين باشينا نه گلديكلرينه اوره كدن وروما ماراقلي و باغليييق و باغلي اولاجاغيق. اورداكي توركمانلار بيزيم ديل قارداشلاريميز و روحسال يولداشلاريميزديرلار. اونلارين گله جكلري بيزه چوخ اؤنه مليدير.
بئله بير دويغو و سئوگيله ائشتيديك عراق كوردوستاني`نين موختار حٶكومتي`نين توركمان وزيري "جودت جرجيس النجار" تبريز شهه رينده آزربايجان خالقينا قوناقدير. البتته كي ايران`دا توركلرله موخاليف اولان گوجلر، اٶز چيركين تأثيرلريني بيراخيب و جودت به ي`ين تبريز`ه گلمه سينه رغمن بوتون اورقانلار و خبر سازمانلاري سوسوب باتميشلار. آنجاق بيز خبرله شيب و جودت به ي`ين اينتئرنشنال هوتئلينده موسافير اولدوغونو دويدوق. اوندان واخت آليب و بير موصاحيبه اوچون حوضورونا يوللانديق. بيزي گوله ر اوز و ايسسي قوجاقلا قارشيلادي. جودت جنابلارينين دئديكلرينه گؤره، او، توركمان كولتور درنه ك باشقاني، كوردوستان، بارزاني دٶولتينده دٶولت وزيري، توركمانلارين سوروملو اولمپيك باشقاني (رئيس كل ورزش كردستان) وظيفه لرينده چاليشاراق، عراق توركمانلارينا خيدمت ائتمكده دير. اونونلا تانيش اولوب سونرا بئله بير دانيشيق آپارديق.
سايت شمس: جودت به ي تبريز`ه نه اوچون گلميشسينيز؟
جودت: درمان و علاج اوچون.
سايت شمس: تبريزده هانسي مسوللارلا گٶرشدونوز؟
جودت: هئچ بير مسول ايله گٶروشوم اولمادي.
سايت شمس: عراقدا توركمانلار هانسي اراضيلرده ياشاييرلار؟
جودت: بو آندا توركمانلار تكجه بير بو اٶلكه ده ياشاميرلار. اونلار چوخ يئرلرده وارديرلار. آمما اربيل`ده و كركوك`دا چوخ ساييدا ياشاييرلار. ايندي اربيل، كوردوستان حٶكومتي نظارتينده دير. آمما كركوك، عراق حٶكومتي چرچيوه سينده دير. توركمانلارين ساييسي كركوك`دا اربيل`دن چوخدور.
سايت شمس : اونلارين سايي نه قده ردير؟
جودت: جمعييت ساييسي چوخ يئكه بير رقم دئييل. توركييه ليلر چوخ دئييرلر، عربلر آزدئييرلر. هر كس اٶز سيياسي ايستيفاده لرينه گؤره آمار وئرير. هله بير دقيق آمار الده يوخدور. صددام دٶورونده توركمانلاري عربله شديرمه سيياستي گئچيريلدي و اونلارين آمارلارينين چوخو آزي يوخودور. حئسابيلا يازيرديلار. صددام`ين سوقوطوندان سونرا هله ليك بير دقيق آمار يوخدور. تخميننن بير ميليوندان آرتيق توركمان واردير. كركوك اراضيسينده توركمانلار چوخ سايييا ماليكديرلر.
سايت شمس : توركمانلار نه دورومداديرلار؟
جودت: توركمانلارين دوروملاري كوردوستان حٶكومتي`نده چوخ ياخشيدير؛ صددام دٶورونده توركمانلار بير وطنداش كيمي ساييلميرديلار. آمما ايندي اونلارين 4 درنگ، 12 پارتييا، 14 اوخول، تورك ديلينده، ايكي آنا اوكول، ايكي كالئج نيلوفر و ايشيق آدلاريلا وارلاريدير. بونلارين هاميسي كوردوستان حٶكومتي طرفيندن مالييه له شير. ايندي بيزيم اوردا آلتي قزئت واريميزدير. لاتين، عرب، كورد و تورك ديلينده يازيليرلار. هامي اٶز فيكير و دوشونجه سيله يازير. نئجه يازماغي بيزه هئچ كيمسه امر ائتمير. دئموكراسي اورادا حاكيمدير. فيكيرلر اورادا آزاددير. حٶكومت طرفيندن هئچ بير سانسور يوخدور. بونلارين جواريندا بير توركمان ائوي واردير. حٶكومت ايذن وئريبدير. بيز هر ايشيميزي اورادا حياتا گئچيريريك، پارلامئنتينده دٶرد ميللت وكيليميز وار. آمما دٶولتده توركمانلارين بير وزيري وار، او دا منه م. گله جكده توركمانلار بيرله شه رلرسه اوندا ايكي وزير اولاجاقدير. اربيل بلدييه سينين 15 عوضوو وار. اونلارين 8 نفري توركماندير. آنجاق توركمانلارين كوردوستان سينيرلاريندا وضعييتلري ياخشيدير. عربلره گئتديكده ايسه وضعييت چوخ آغيردير.
اربيل`ده اولان توركمانلار هاميسي ميللتچيديرلر. كوردوستان حٶكومتي اونلاري و اونلار دا حٶكومتي رسمييته تانيييرلار.
سايت شمس: كركوك`دا توركمانلارين دورومو نييه آغيردير؟
جودت: كركوك`دا، شيعه و سونني پروبلئمي واردير. شيعه لر بير طرفدن قاريشديريرلار، عربلر ده بير آيري طرفدن، توركييه ده بير آيري طرفدن وضعييتي آغيرلاشديرير. كركوك`دا سون سئچيملرده بير آمار اله گلدي، هامي شاشيردي. 390 مين كورد، 90 مين توركمان، 30 مين عرب رأي صانديقلارينا گلديلر. كورد`ون سايي چوخ اوستون گٶروشدو.
عربلر ايسته ييرلر كورد`ون قاباغيندا دايانسينلار. توركمانلاري دا بو آرادا بوروشدورورلار. توركمانلار رأي وئرمه دي. عربلر قورخورلار كركوك كوردوستان حٶكومتي الينه دوشه و بٶيوك كوردوستان اوزه چيخا. اونا گؤره چاليشيرلار سئچيملري تحريم ائتسينلر، بو آرادا توركمانلار`ا ضربه وورورلار. توركمانلار كركوك`دا سيياسي باخيمدان چوخ موهومدورلر. بو سيياسي جهتدن چوخ پيسدير. نييه كي هر كس اوندان ايستيفاده آپارماق ايسته يير. بئله بير دوروم قورخولودور و بو توركمانلارين منافئعينه دئييل.
سايت شمس: سيزين اٶزونوز كركوك`ا نئجه يارديم گٶسته ره بيليرسينيز؟ بورادا دئييرلر كي كركوك`دا توركمانلار كوردلرين باسقيسي آلتينداديرلار. بيز بئله بيليريك كي كوردلر قويمورلار توركمانلار اٶزلرين گوستره بيلسينلر.
جودت: كاش گليب كركوك`و اٶزونوز ياخيندان گٶره يدينيز. بو سٶزلرين يانليش اولماسينا اينانارسيز. منيم كركوك`دا اٶزومون قوروپوم واردير. توركمان مساله لرينده هئچ بير باسقي كورد طرفيندن يوخدور. كركوك`دا توركمان جبهه سي كندينه (اٶزونه) صاحيب دئييل. صاحيب اولسايديلار چوخ منفعتلري اولاردي. ميثال: اونلار هر بير اولدوغو ايشده توركييه يه دٶنورلر. توركييه بئله ليكله اورادا اٶز حوضورونا برائت قازانديرير. توركمانلارين مساله سي حلل اولسا توركييه نين ووجودونا گره ك يوخدور. توركييه چاليشير كركوك مساله سي حلل اولماسين و اٶز حوضورونا بهانه تاپسين. من سيزي اورانين گٶروشونه دعوت ائديره م. اٶزونوز گلين و اٶز گٶزلرينيزيله گٶرون. عرب پارتييالاري توركمانلارا باسقي ياپيرلار. يالانچي توركمانچيليق آپاريرلار. توركمان جبهه سي توركييه شوعارلاريني وئرير. آتاتورك آدينا تبليغ ائدير. ائله بيل ايران`دا ياشاييرسان و آيري بير حٶكومتين رهبريني تبليغ ائديرسه ن، بئله بير ايش اولارمي هئچ؟ بو مساله ني داها ياخشي گٶسترير. كركوك`دا ميللت آراسيندا، بئله بير ايشلر دسته كله نمير. اوردا ميللت موناسيبتي ياخشيدير. آمما پارتييالار آراسيندا دوروم آغيردير.
سايت شمس: سيزجه كركوك مساله سي نئجه حلل اولماليدير؟
جودت: اورادا بير ميثاق وئريليبدير. اونون 58 اينجي ماده سينده دئييلير كي كركوك جمعييتي 57 ينجي سنه سينده اولان دوروملا حئسابلانسين. او سنه ده كركوك`دا ياشايانلار كركوكلو و سونرا گله نلر آيري حئسابلاشسين. صددام زاماني كركوك`ا چوخلو عربلر گليب يئرله شيبلر و اورانين جمعييتيني اوز منافئعلرينه چئويريبلر. عئين حالدا اورادا بير جمعييت كونترول ائتمه سيياستي ياشانيبدير. كركوك`دا هر تورك`ون عاييله سينين ايكي يا بير اوشاغي واردير. آمما هر كورد ائوينين 11 – 12 اوشاغي واردير. (بو دا اوجالان`ين دئدييي اساسدادير) كوردلر اورادا بير جمعييت اينفيجاري يارالديبلار. اونلار كركوك جمعييتيندن حئسابلانسا، بيزه ضرر ائده ر. اونا گؤره بيز دئييريك كركوك`ون جمعييتي 57 سنه ده كي دورومويلا حئسابلانسين.
ايندي كوردلر كركوك`دا سيياسي باخيمدان چوخ چاليشيرلار كركوك`و عربلردن آلماقدا توركمانلار`ا يارديم ائتسينلر. بعثيلر كورد و تورك`ون ايش بيرلييينه راضي دئييللر. آخي كركوك`و اٶزلرينه ساخلاماق ايسته ييرلر.
توركمان جبهه سي افسوس اولسون كي بو مساله ني درك ائتمير. سئچيملرده كركوك`دا ايشتيراك ائده ن توركمانلار ساده جه 90 مين اولدو. بيزه هامي گولدو كي سيز دئييرسينيز كركوك`دا بير ميليون توركمان وار آمما 90 مين نفر اولورسونوز. بو سئچيملرده توركمانلار آراسيندا ايتتيفاق يارانمادي. بير سيرا آيت الله سيستاني`نين چته سي آلتيندا قرار تاپديلار. توركمانلار آراسيندا سونني و شيعه مساله سي ياراندي، 60 فاييز سيستاني چته سينده يئرله شدي. علاوي پارتيسي، چلبي پارتيسي دا واردير. 10 فاييز كوردلر 10 فاييز توركمان جبهه سيندن رأي وئريلدي.
سايت شمس: بو اختلاف ندندير؟
جودت: بو ايختيلافلار بير جور دئييل، بيز عراق مملكتينده بير اقلييتيك. توركمان جبهه سي دئيير كي بيز توركييه دن گلميشيك. آمما بيز اٶزوموزو آزربايجانلي بيليريك. اونلار توركييه لي بيليرلر. بيز توركمانلار اوردا بير سيرا كورد ايچينده و بير سيرا عرب ايچينده ييك. بيز اوردا اقلييتيك. بيرلييه چوخ ائحتيياج واردير. بيز اوردا واحيد بير توپلوم دئييليك، آيري آيري جزيره لر كيمي ياشاييريق. بيزيم ياشاديغيميز يئرلرده كوردلر و عربلر ده ياشاييرلار. بو صددام زامانيندان بيزه ياديگار قاليبدير. او زامان صددام توركمانلاري چوخ سيخيردي. اونلارين ائولرين اللريندن آليرديرلار. اونلار ساواش دٶنه مي شهيد اولاندا، محو اولوب گئديرديلر. بعثيلر توركمانلاري كٶچوردوب و اونلارين اراضيسينده عربلري و كوردلري يئرله شديرديلر.
سايت شمس: ايندي سيزجه نه جور اولماليدير؟
جودت: اربيل`ده ايش چتين دئييل. آمما كركوك قاريشابيلير. عراق`دا ايندي چوخ توركمان ميللت وكيلي واردير. "فيها زين العابدين" آدلي بيري موسللحانه داعوا اٶنه ريسيني وئردي. فتوا وئردي جنگ اولسون، توركمانلار اونلاري ردد ائتديلر.
سايت شمس: آمريكاليلار سيزلرله نئجه داورانيرلار؟
جودت: آمريكا ايسته مير كركوك كوردلرين الينه گئچسين و نه ده توركمانلارين الينه دوشسون. آمريكا ايسته يير اوردا اورتاليق هميشه قاريشيق اولسون و بئله ليكله اورا اٶزو حاكيم اولوب و اورانين نفتيني آپارسين.
سايت شمس: ايران حٶكومتينين وضعييتي اوردا نئجه دير؟
جودت: ايندي ايران حٶكومتي طرفيندن موستقيم ديخالته ايمكان يوخدور. آمما سيياسي جهتدن شيعه لر اونلارا باغليدير. كركوك`دا ايران نه ايسته رسه سيستاني واسيطه سيله اله گئچيرير. ايران`ين تأثيري وار، آمما چوخ گٶزه چارپمير. ايران شيعه ايسلامي پارتيياسي يولويلا تأثير ائدير. ايندي عراق`دا دئييرلر كي "ابراهيم جعفري" ايران`ا گئتدي، بويوروق آلدي و عراق`ا قاييتدي. ايران بئله تأثير قويور، موستقيم دخالت ائتمير. ايران حٶكومتي توركمانلار`ا هئچ بير يارديم ائتمير. آمما شيعه توركمانلار`ا بلكه يارديمچي اولور.
سايت شمس: توركمانلارين ايقتيصادی دوروملاری نه يئرده دير؟
جودت: توركمانلار اربيل بازارينا حاکيمديرلر کرکوک`دا دا عئينی شکيلده دير. توركمانلار اورتاق و وارلی طبقه سينده يئرله شيرلر. اربيل`ده ايندی ايش چوخدور و ایشسيزليک يوخدور. بير گنج ساده ايشچی 20 دولار، اوستا اولاندا گونده 50 دولار پول آلير. ايشده نه قده ر ايشله سه ن وار.
سايت شمس: آيری دٶولتلرين دخالتلريني، توركمانلار نئجه گٶرورلر؟
جودت: من تورکييه ليلره دئديم: سيز کی بير بئله توركمان هارايی وئريرسيز، صددام زامانی هاردا قالميشدينيز؟ اوندا کی بيزی آسيب کسيب اٶلدوروردولر، هاردایدينيز؟ اوندا موداخيله ائتمه ديز، ايندی موداخيله ائدیرسيز و بورانی قاتماق ايسته ييرسيز. توركمانلار دئييرلر، ايران و تورکييه بيزی پارچالادی. شيعه و سوننی آيريليغی سالديلار. چوخ زامان چکه ر کی بير ده توركمانلار بيرله شسينلر. آمما بيز چاليشيريق بيرليک يارالداق.
سايت شمس: سيزی چوخ يوردوق، باشقا سٶزوز وار می؟
جودت: سيزدن تشکور ائديره م کی بو واقتي منه وئردينيز و بو صٶحبتلری آپاردينيز. آرتيق سٶزوم يوخ. ساغ اولون!
http://www.shamsnews.com/jodat.htm
posted by Mehran Baharlı @ 5:09 PM
0 comments
